पदवीधर व शिक्षक निवडणूकीसाठी मतदार नाव नोंदणी करण्याचे आवाहन

कोकण, नागपूर व औरंगाबाद या विभागात शिक्षक मतदारसंघ तसेच नाशिक व अमरावती या विभागात पदवीधर मतदारसंघाच्या निवडणूका २०२३ मध्ये होणार असल्याने, येत्या १ ऑक्टोबर ते ७ नोव्हेंबर २०२२ या दरम्यान पात्र शिक्षक तसेच पदवीधरांनी नाव नोंदणीसाठी अर्ज सादर करावेत असे आवाहन महाराष्ट्र राज्याचे मुख्य निवडणूक अधिकारी श्रीकांत देशपांडे यांनी मुंबई मराठी पत्रकार संघ येथे आयोजित पत्रकार परिषदेत केले. पत्रकार परिषदेस त्यांचेसोबत उप मुख्य निवडणूक अधिकारी शरद दळवी उपस्थित होते.

राज्यात विधान परिषद पदवीधर व शिक्षक मतदारसंघाच्या निवडणूका दर सहा वर्षांनी घेतल्या जातात. त्याकरीता पात्र शिक्षक व पदवीधरांनी प्रत्येकवेळी नव्याने मतदार नाव नोंदणी करणे आवश्यक असल्याने, पदवीधर मतदारसंघ निवडणूकीसाठी १ नोव्हेंबर २०२२ पूर्वी किमान ३ वर्षे अगोदर कोणत्याही शाखेतून पदवी प्राप्त नागरीक अर्ज क्र.- १८ भरुन पदवीधर मतदार नाव नोंदणी करु शकतात. हा अर्ज नाशिक व अमरावती विभागीय आयुक्त, जिल्हाधिकारी, उप विभागीय अधिकारी तसेच तहसिलदार कार्यालयात उपलब्ध असणार आहे. तसेच महाराष्ट्र राज्याचे मुख्य निवडणूक अधिकारी यांच्या https://ceo.maharashtra.gov.in/downloads/downloadforms/forms-18.pdf या संकेतस्थळावर सुध्दा उपलब्ध असून, अर्जासोबत पदवी प्रमाणपत्राची किंवा गुणपत्रिकेची साक्षांकित छायाप्रत जोडणे आवश्यक असल्याचे व दि.१ ऑक्टोबर २०२२ पर्यंत पदवीधर मतदारसंघाकरीता ऑनलाईन नाव नोंदणीची सुविधा देण्याचा प्रयत्न राहील असे त्यांनी सांगितले.

तसेच शिक्षक मतदार नोंदणीकरीता १ नोव्हेंबर २०२२ रोजी लगतच्या सहा वर्षांमधील किमान ३ वर्षे माध्यमिक शाळेपेक्षा कमी दर्जा नसलेल्या संस्थेत कार्यरत असलेले शिक्षक हे मतदार नाव नोंदणीसाठी पात्र असून, ते अर्ज क्र.- १९ भरुन शिक्षक मतदार नाव नोंदणी करु शकतात. हा अर्ज कोकण, नागपूर व औरंगाबाद विभागीय आयुक्त, जिल्हाधिकारी, उप विभागीय अधिकारी तसेच तहसिलदार कार्यालयात उपलब्ध असणार आहे. त्याचप्रमाणे महाराष्ट्र राज्याचे मुख्य निवडणूक अधिकारी यांच्या https://ceo.maharashtra.gov.in/downloads/downloadforms/form-19.pdf या संकेतस्थळावर सुध्दा उपलब्ध राहणार असून, अर्जासोबत विहित नमुन्यातील शैक्षणिक संस्था प्रमुखांचे प्रमाणपत्र जोडणे बंधनकारक असल्याचे देशपांडे यांनी सांगितले.

येत्या कालावधीत होणाऱ्या पदवीधर व शिक्षक मतदार नाव नोंदणीसाठी राजकीय पक्ष, मतदान केंद्र स्तरीय प्रतिनिधी किंवा रहिवासी वा कल्याणकारी संस्थाकडून एकगठ्ठा स्वरुपात प्राप्त होणाऱ्या अर्जांचा विचार केला जाणार नसल्याचे, तसेच पदवीधर व शिक्षक मतदारसंघाकरीताची प्रारुप मतदार यादी २२ नोव्हेंबर २०२२ रोजी प्रसिध्द करण्यात येणार असून, यादी संबंधी दावे व हरकतींचा कालावधी २३ नोव्हेंबर ते ९ डिसेंबर २०२२ असणार आहे. २५ डिसेंबर २०२२ रोजी दावे व हरकती निकालात काढून अंतिम मतदार यादी ३० डिसेंबर २०२२ रोजी प्रसिध्द करण्यात येणार असल्याची माहिती मुख्य निवडणूक अधिकारी श्रीकांत देशपांडे यांनी दिली.